الله ما بنكرهك يا ريس ...

و الله ما بنكرهك يا ريس ...

بجد ..

و الله ..

و الله ما بكرهك يا ريس ..

داحنا شعب طيب .. و عاطفى .. و رومانسى .. و سهل ينضحك عليه بكلمتين .. علشان كده ..

و الله ..

و الله ..

و الله ما بنكرهك يا ريس ..

لكن ..

لكن برضه عايزين حاجة نحبك بيها ..

حاجة نفتكرك بيها ..

حاجة نفرح بيها ..

حاجة نعتز و نفخر بيها ...

و بدل ماحنا موش بنكرهك ..

.....

....

نحبك ..

عارف معاليك أنا بحب اللغة العربية و موش بكتب غير بيها .. لغة القرآن .. لغة أهل الجنة .. بس أنا واحد م الشعب .. بلاها المثقفين .. و المتعلمين المتنورين .. واحد صنايعى على باب الله .. موظف غلبان أبو عيال .. حاجة ذى كده .. مواطن بسيط يعنى ...

و المواطن البسيط ده مالهوش غير طلب واحد ... و ما هو صعب و الله ... لا ح اقول لفخامتك البطالة و لا الغلاء و لا الفساد .. ح نقول دى حاجات عالمية ف كل الدنيا و مصر أم الدنيا علشان كده الحاجات دى فيها أكتر ... أم الدنيا يا ناس .. رد منطقى و مقنع .. ماشى يا ريسنا .. قبل ما أقول لمعاليك على طلبى الوحيد .. ممكن يعنى لو فيها جرءة أسأل سؤال ؟.. و الله هو سؤال واحد .. و ما هو خارج و لا متجاوز و لا قبيح ... الرئيس عبد الناصر حكم مصر بالعصا و دخل حربين خسر فى تلاتة و حط ناس ف السجون أضعاف النهاردة .. و بعده الرئيس السادات كسب الحرب العظيمة ورجعلنا كرامتنا و فتح باب الحريات و الأحزاب و لو انه موش ع الآخر .. وارب الباب مثلا .. الغريب بقى .. و العجيب بقى ... تلاقى حبايب عبد الناصر و حتى الناس اللى موش عاصرته ملايين .. ملايين .. و فكر ناصرى .. و أتجاه ناصرى .. و حزب ناصرى .. عمرنا سمعنا عن واحد ساداتى الأتجاه و لا واحد عايز يعمل حزب ساداتى ... حتى يا ربى اللى بيؤيدوا السادات و يقولوا سبق عصره صوتهم واطى و على أستحياء .. بجد موش حاجة غريبة ..  لا و الله دى حاجة تجن .. الشعب ده معتوه مثلا ؟ .. أنا عن نفسى يمكن على قد فهمى عندى تفسير للموضوع ده و يمكن غلطان .. و لو غلطان .. سك فخامتك على طلبى ... عبد الناصر عاش و مات .. و رغم هزايمه .. و رغم قسوته على شعبه .. الا انه عاش و مات لم يصافح يهودى قط ...!!! عبد الناصر عاش و مات معتز بكرامته و اللى حبسهم بكوا عليه و اللى خد فلوسهم اترحموا عليه .. شعب غريب .. شعب كرامة و عزة نفس .. رغم كل الظروف يكره الذل و الأنقياد .. لو تفسيرى ده صح يا ريس و عايزنا نحبك .. بلاها معاهدة السلام .. موش عايزين أى حاجة تانية لأن كل المشاكل ح تتحل بعد كده لأنها أصلا ماجاتش غير بعد المعاهدة السودة دى يا ريس .. يعنى نحارب ..؟؟ بلاش نحارب .. بس بلاش نطاطى .. و أصلا عايز أعرف .. و الله بجد نفسى أسأل و عاقل يجاوبنى .. هى موش برضه السياسة دى فيها شوية عقل و لا السياسة عبط لوما آخذة ... لو سألنا اليهود بيدخلوا سينا من غير تأشيرة ليه ؟.. نقول دى معاهدة السلام و وافقنا مضطرين علشان نرجع سينا .. ماشى ... طب اذاى بلدى و أرضى و أنا مقدرش أحط فيها عسكرى واحد موش كتيبة و لا لواء و لا فرقة ؟.. ماشى .. عشان نرجع سينا .. ماحنا مضطرين و بنتنازل .. بنهدى الغاز البنى صهيون ببلاش و احنا جعانيين ليه ؟.. علشان رجعنا سينا .. ماشى .. و الله كلام جميل .. مفيش منشآت عسكرية ف سينا ليه ؟ ...علشان معاهدة السلام كده و عايزين نرجع سينا .. أخويا فى الله و العروبة أشوفه بيندبح قصاد عينى ف غزة و ما اقدرش حتى افتح بقى .. لية ؟ علشان معاهدة السلام .. علشان نرجع سينا .. أمريكا تسلح أسرائيل و احنا تهمة كبيرة لو مطوة عدت من رفح لغزة .. مصيبة .. ليه ..؟؟ دول جيرانا و احنا بينا معاهدة سلام علشان نرجع سينا ... طب لما كل التنازلات دى علشان نرجع سينا طب كان لزمته أيه العبور أصلا ..

لزمته أيه العبور أصلا ؟

دم الشهدا أخواتنا و آبائنا راح فين ..؟؟

فايدتها أيه سنين التدريب و التعبئة و الحرب ؟؟

عارف يا ريس و الله ..

و الله لو حجمنا المعاهدة السودة دى كل حاجة ح تتعدل بعديها ...

سنة 67 و لا 68 و لا 69 و لا  حتى 76 .. عمرنا سمعنا عن حد جاع و لا واحد قتل أبوه و لا واحد سرق البلد و هرب و لا حد خد أرض بالوف باعها بمليارات و لا و لا و لا و لا ..

الناس كانت بتستحى .. كنا بنحارب .. عندنا عدو .. دا اللى ذى أمريكا و معندهوش عدو .. يخترعله عدو .. علشان يحفز شعبه و ينشط جيشه يا ريس .. و احنا عدونا واضح قدامنا بيدبح فينا ..

و منقولش ألمانيا حاربت أوروبا كلها و احتلت فرنسا و دلوقتى ايدها ف ايد فرنسا .. فرنسا مالهاش شبر عندها و لا متر من غير سيادة و لا ألمانيا لسة بتدبح ف الأوروبيين ... يا ريس " ما ترك قوم الجهاد الا ذلوا " .. و الله احنا كرعنا ذل و المهانة يقت مالية قلوبنا ...

بلاها حرب يا ريس بس باش نبقى نطاطى ..

اقول لمعاليك على حاجة  ... و خدنى المعتقل جت عليى يعنى هو انا اللى ح ازود العشرين ألف .. دانا ابقى حتى متهم يتهمة مخزية .. الخيانة الكبرى .. عار.. أقول لفخامتك ... لو كان الذل ده كله و المصايب اللى احنا فيها علشان سينا .. ف داهية سينا ... و لما بقى نقدر نرجعها صح .. و بكرامتنا و نستاهلها نبقى نرجعها ...

و الله فعلا ما بنكرهك يا ريس ..

لكن نفسنا نحبك .